Faċilità għat-Trattament Termali

Faċilità tal-Inċineratur

Il-Faċilità tal-Inċineratur (Thermal Treatment Facility (TTF)) li tinsab il-Marsa tikkonsisti f’inċineratur li juża s-sħana biex jiproċessa skart mill-biċċerija, skart kliniku u tipi ta’ skart perikolużi oħra. Din tinkludi ukoll impjant t’awtoklava li jittratta skart b’tessuti ġejjin mill-annimali qabel ma jgħaddi għall-proċess t’inċinerazzjoni.

L-inċineratur, li ġie inawgurat f’Diċembru tal-2007, ħa post iż-żewġ inċineraturi qodma u għen biex iżid l-effiċjenza tal-operat. Biex it-temperaturi għoljin tal-forn tiegħu jiġu operati, l-inċineratur jitħaddem minn enerġija elettrika, Żejt tat-Tisħin (HGO) u tallow li jiġi prodott ġol-awtoklava.

L-awtoklava, li ġiet installata fl-2015, hija faċilità ta’ qabel it-trattament li tipproċessa madwar 2,500 tunellata fis-sena ta’ skart ġej mit-tessut tal-annimali. Dak li jirriżulta mill-proċess tar-rendering imbagħad jintuża bħala karburant għall-Faċilità tat-Trattament Termali. Apparti li dan jagħmel l-impjant iktar effiċjenti, dan jikkontribwixxi ukoll lejn l-impenn li qed tieħu Malta biex jitnaqqsu l-emissjonijiet tal-gassijiet t’effett serra u biex jiġu ġġenerati riżorsi t’enerġija rinnovabbli. Iktar minn hekk, il-Faċilità tat-Trattament Termali topera f’komformità mar-Regolamenti dwar il-Prevenzjoni u l-Kontroll Integrat tat-Tniġġis tal-Emissjonijiet Industrijali (L.S. 549.77)

Il-Faċilità tal-Inċineratur tkun miftuħa mis-06.00 sal-17.30. L-aħħar dħul ikun fil-17.00. Annimali domestiċi u żwiemel mejta jiġu aċċettati 24/7.

Ġie mħabbar li faċilità ġdida b’investiment ta’ €50 miljun ser tieħu post din il-faċilità fil-Marsa. Il-faċilità l-ġdida se tkun mgħammra bl-aħjar teknoloġija disponibbli. Dan mhux biss se jkun qed jiggarantixxi prestazzjoni ambjentali ideali iżda ħa jkun ukoll qed jiġi kkunsidrat il-potenzjal li tiġi iġġenerata enerġija nadifa waqt il-proċess ta' inċinerazzjoni.

Kwalità u Politika Ambjentali

Permezz tal-Faċilità tal-Inċineratur, Wasteserv tfittex li tagħti servizz nazzjonali permezz tal-proċess tar-rendering u l-inċinerazzjoni. Il-Faċilità hija mwaqqfa biex tittratta annimali mejta, fdalijiet ta’ annimali, skart li joriġina minn kliniċi u sptarijiet, u skart perikoluż ieħor.
L-għanijiet ewlenin tal-Wasterserv huma li, tfittex li tikseb is-sodisfazzjon tal-klijenti, tipproteġi l-ambjent u tipprovdi servizzi affidabbli tal-immaniġjar tal-iskart, li jkun ukoll favur l-ambjent, lil dawk l-entitajiet li jipproduċu l-iskart, dawk li jġorru l-iskart u s-sidien tal-annimali domestiċi.

Permezz tal-operat fl-Inċineratur, u tal-fergħat varji l-oħra li joffru appoġġ, il-Wasteserv tħabrek biex:

Tikkonforma mal-permess IPPC IP 0004/07 u mal-liġijiet u r-regolamenti ambjentali applikabbli kollha li jirrigwardjaw l-aspetti u l-impatti ambjentali tagħna;
Tuża l-impjant (u rizorsi tagħha) b’mod effettiv;
Ittejjeb il-kapaċità tar-rimi tal-iskart perikoluż;
Timmonitorja il-konsum tal-fuel u l-eletriku;
Tissorvelja u tikkontrolla t-tniġġis tal-arja, effluwent u rmied iġġenerat;
Timplimenta miżuri ta’ preparazzjoni għal każijiet ta’ emerġenza sabiex tnaqqas u tikkontrolla ir-riskju ta’ nirien u t-tixrid ta’ żjut;
Tikseb feedback pożittiv minn dawk l-entitajiet li jipproduċu l-iskart, dawk li jġorru l-iskart u s-sidien tal-annimali domestiċi.

Dawn l-għanijiet huma reveduti kull tliet xhur u l-istatus tagħhom huwa diskuss fil-laqgħat mal-Maniġment

Bil-għan li nimplimentaw din il-politika, aħna adottajna sistema ta’ immaniġjar ibbażata fuq ir-rekwiżiti tal-ISO 9001:2015 u ISO 14001:2015.

Aħna impenjati li ntejbu kontinwament is-sistema tal-immaniġjar tagħna u l-effiċjenzja tagħha b’mod kostanti u ripetut. Din il-politika hija kkomunikata, u spjegata, lill-membri kollha tal-personal fi ħdan l-organizzazzjoni. Ahna ser inkunu qed nikkominikaw din il-politika mal-pubbliku, mal-viżitaturi u mal-kuntratturi fil-Faċilità.

Din il-politika tiġi rriveduta perjodikament sabiex jiġi żgurat li l-enfasi fuq il-ħtiġijiet tal-klijenti u preservazjoni tal-ambjent tinżamm, u biex il-miżuri tal-wegħda tagħna lill-klijenti jinkisbu.

Jekk jogħġbok agħfas hawn għar-regoli tas-sit